Shirin tallafawa mata na Najeriya mai suna Nigeria for Women Project Scale-Up (NFWP-SU) a jihar Gombe, ya yi gargaɗi ga al’umma kan wani ƙirƙirarren link da ke yawo a kafafen sada zumunta da sauran hanyoyin sadarwa, wanda ake iƙirarin cewa yana bayar da tallafin kuɗi ga mutane ƙarƙashin shirin.
Jami’ar kula da shirin a jihar Gombe, Hajiya Hauwa Ibrahim Hassan, ce ta bayyana hakan a cikin wata sanarwa, inda ta ce shirin bai da wata alaƙa da link ɗin da ake yaɗawa, tana mai bayyana shi a matsayin hanyar yaudarar jama’a.
Ta buƙaci al’umma da su yi taka-tsantsan, tare da guje wa danna link ɗin, cike bayanan sirri, bayar da bayanan asusun banki, lambobin tabbatar da sahihancin asusu ko biyan kuɗi ga duk wanda ya nemi hakan bisa sunan shirin.
Hajiya Hauwa ta bayyana cewa duk wani sahihin bayani da ya shafi tallafin kuɗi, taimakon walwala, shirye-shiryen ƙarfafa mata da sauran ayyukan shirin, za a sanar da jama’a ne ta hanyoyin sadarwa da hukumomin shirin suka amince da su.
Ta kuma buƙaci sassan aiwatar da shirin a ƙananan hukumomi (LPIUs), masu taimakawa shirin a matakin gundumomi, mambobin ƙungiyoyin mata na Women Affinity Groups (WAGs) da sauran masu ruwa da tsaki a cikin al’umma da su yi watsi da saƙon na bogi, tare da taimakawa wajen hana yaɗuwarsa.
Jami’ar ta sake jaddada aniyar shirin na kare martabarsa, tsaron waɗanda ke cin gajiyarsa da kuma tabbatar da cewa ‘yan damfara ba su yi amfani da sunan shirin wajen cutar da jama’a ba.
Sanarwar ta ƙara da cewa, domin samun sahihan bayanai ko ƙarin haske kan ayyukan shirin, jama’a za su iya tuntuɓar ofishin kula da shirin na Jihar Gombe ta layin waya kyauta mai lamba 08000070777.
