Ƙungiyar Kaduna State Climate Change Accountability Mechanism (KADCCAM) ta yi kira ga mafarauta, manoma, ’yan kasuwa da sauran al’ummar Jihar Kaduna da su guji kona dazuzzuka ba bisa ƙa’ida ba, tare da ɗaukar matakan kariya daga tashin gobara yayin da lokacin hunturu (Harmattan) ke gabatowa.
Ƙungiyar ta yi gargaɗin cewa yanayin lokacin Harmattan, wanda ke tattare da bushewar ciyayi, ƙarancin danshi a iska, iskar ƙura da tsananin bushewa, na iya haifar da saurin yaɗuwar gobara a unguwanni, kasuwanni, gonaki, dazuzzuka da sauran wuraren da ke da rauni.
A cikin wata sanarwa, Mataimakin Daraktan ƙungiyar KADCCAM, Ibrahima Yakubu, ya shawarci mafarauta musamman da su daina cinna wa dazuzzuka wuta yayin farauta, yana mai gargaɗin cewa irin wannan ɗabi’a na iya haddasa mummunar gobara, lalata ciyayi da bishiyoyi, hallaka namun daji tare da jefa al’ummomin da ke kusa cikin haɗari.
Ya kuma shawarci manoma, iyalai, ’yan kasuwa da masu kamfanoni da su riƙa taka-tsantsan wajen amfani da wuta, kayan girki, na’urorin lantarki da sauran abubuwan da ka iya haddasa gobara.
Ibrahima Yakubu ya gargaɗi al’umma kan illar kona daji ba bisa ƙa’ida ba, zubar da ragowar sigari ba tare da kulawa ba, ƙona shara a fili da kuma ajiye abubuwa masu saurin kamawa da wuta a kusa da wuraren zafi.
Ya ƙara da shawartar gidaje da cibiyoyi da su riƙa duba wayoyin lantarki a kai a kai, kashe na’urorin da ba a amfani da su, samar da kayan kashe gobara gwargwadon iko, tare da tabbatar da cewa hanyoyin shiga da fita na gaggawa suna a buɗe.
Baya ga rigakafin gobara, KADCCAM ta nuna damuwa kan wasu ayyukan da ke lalata muhalli, waɗanda ka iya ƙara ta’azzara illolin lokacin Harmattan, ciki har da zubar da shara barkatai, sare bishiyoyi ba bisa ƙa’ida ba, lalata ciyayi da kuma ayyukan da ke haifar da gurɓatar iska.
Ƙungiyar ta kuma yi kira ga manoma da makiyaya da su rungumi hanyoyin kula da ƙasa masu kare muhalli, da kiyaye bishiyoyi da ciyayi, tare da guje wa kona daji ba tare da kulawa ba, domin rage zaizayar ƙasa da kuma kiyaye daidaiton muhalli.
Haka kuma, ta shawarci mazauna jihar da su ɗauki matakan kariya daga ƙurar Harmattan da sauran matsalolin lafiya da muhalli, ta hanyar rage shiga wuraren da ƙura ke da yawa, kula da tsafta, kiyaye hanyoyin samun ruwa da kuma ba da kulawa ta musamman ga yara, tsofaffi da mutanen da ke fama da matsalolin numfashi.
KADCCAM ta jaddada cewa kare muhalli da hana afkuwar ibtila’in gobara nauyi ne da ya rataya a wuyan kowa, wanda ke buƙatar haɗin gwiwar hukumomin gwamnati, sarakunan gargajiya da na addini, ƙungiyoyin al’umma, ƙungiyoyin farar hula da daidaikun jama’a.
Saboda haka, ƙungiyar ta buƙaci mazauna jihar da su gaggauta kai rahoton duk wata gobara ko aukuwar matsalar muhalli ga hukumomin da abin ya shafa, maimakon ƙoƙarin tunkarar gobara mai haɗari ba tare da horo ko kayan aikin da suka dace ba.
A ƙarshe, KADCCAM ta yi kira ga kowane mazaunin Jihar Kaduna da ya ɗauki kare muhalli a matsayin nauyin da ya rataya a wuyansa a kullum, tana mai cewa hana gobara, kare bishiyoyi, rage gurɓatar muhalli da tsaftace unguwanni su ne muhimman matakai wajen gina Jihar Kaduna mai aminci, lafiya da kuma juriya ga sauyin yanayi.
