Jam’iyyar Peoples Democratic Party (PDP) ta sanar da korar Honorobul Khamisu Ahmed Mailantarki da Honorobul Usman Aliyu Garry, dukansu daga jihar Gombe, bisa zargin aikata ayyukan cin amanar jam’iyya da karya dokokin kundin tsarin mulkinta.
A cikin wata sanarwar manema labarai da Sakataren Yaɗa Labarai na Ƙasa na PDP, Honorobul Jungudo Haruna Mohammed, ya sanya wa hannu, jam’iyyar ta bayyana cewa an ɗauki matakin ne bayan kwamitin ladabtarwa ya gudanar da bincike tare da gabatar da sakamakonsa ga hukumomin jam’iyyar da abin ya shafa.
Sanarwar ta ce an same su da laifukan da suka haɗa da yi wa jam’iyya zagon ƙasa, rashin ɗa’a mai tsanani da kuma aikata abubuwan da za su iya ɓata mata suna, wanda ya saɓa wa sashe na 58(1)(a), (b), (h) da (j) na kundin tsarin mulkin PDP na shekarar 2017.
Jam’iyyar ta ƙara da cewa an bi ƙa’idojin adalci da ba wa waɗanda ake zargi damar kare kansu, kamar yadda sashe na 57(6) na kundin PDP da sashe na 36 na Kundin Tsarin Mulkin Najeriya na 1999 suka tanada.
A cewar sanarwar, daga yanzu Khamisu Mailantarki da Usman Aliyu Garry sun daina kasancewa mambobin PDP, kuma ba su da wani haƙƙi ko gata a ƙarƙashin jam’iyyar.
A ƙarshe, PDP ta jaddada cewa babu wani mamba da ya fi ƙarfin dokokinta, tare da kira ga sauran mambobi da su kasance masu biyayya, ladabi da haɗin kai domin ƙarfafa jam’iyyar a dukkan matakai.
