‘Yan sanda a kasar Australiya sun ce ‘yan bindigar da suka kashe mutane 15 a wurin wani bikin yahudawa a gundumar Bondi Beach dake bakin ruwa a Sydney, babban birnin kasar, wani uba ne da dansa.
An kashe uban mai shekaru 50 da haihuwa a wurin harin, yayin da dan nasa mai shekaru 24 ya ji mummunan rauni, yana kuma kwance a asibiti.
Jami’ai sun fadawa manema labarai a ranar litinin cewa harbe-harben na jiya na nuna kin jinin yahudawa ne.
‘Yan sanda suka ce har yanzu mutane 40 suna asibiti a bayan harin, cikinsu har da wasu ‘yan sanda biyu da suka ji mummunan rauni amma suna murmurewa.
‘Yan sandan suka ce mutane kimanin dubu 1 ne suka hallara a wani wurin shakatawa dake wannan bakin gabar ruwa da yayi suna domin murnar bukin yahudawa na Hanukkah.
A halin da ake ciki, mutanen Australiya suna yaba ma wani farar hula da aka gani a cikin hotunan bidiyo ya kama dan bindigar da kokuwa, suna mai bayyana shi a zaman mutumin da ya ceci rayukan mutane da yawa. Gidan telebijin na Channel 7, yace wannan farar hula, wani mutumi ne dan shekara 43 mai suna Ahmed al Ahmed, wanda ke da wani kantin sayarda kayan marmari.
Hotunan bidiyo da aka yada ta kafofin sada zumunci na Intanet, sun nuna Ahmed sanye da farar riga ya labe a bayan wata mota dake kusa, ya sulalo bayan dan bindigar ya kwace makamin daga hannunsa.
Wani dan’uwan wannan mutumin da shugabannin Australiya da na kasashen waje ke bayyanawa a zaman gwarzo, yace an harbi Ahmed a hannu da kuma a damtsensa sannan kuma Shi ma dan bindigar ya harbe shi har sau biyu, kuma yana asibiti an yi masa tiyata.
