Wani jirgin kasa mai saurin tafiya ya goce daga kan layin dogonsa ya kara tare da ture wani jirgin daban daga kan layinsa na dogo a yankin kudancin Spain, inda hukumomin ‘yan sanda suka tabbatar da cewa mutane akalla 21 sun mutu.
Wannan hatsarin ya faru ne a kusa da Adamuz a lardin Cordoba, inda gidan telebijin na kasar, Television Espanola, ya kara da cewa mutane 100 sun ji rauni, guda 25 daga cikinsu mummunan rauni.
Gidan telebijin na Espanola ya kara da cewa direban daya daga cikin jiragen wanda ya taso daga Madrid a kan hanyar zuwa Huelva, na daga cikin wadanda suka mutu.
Kamfanin dake tafiyar da layukan dogo na kasar, Adif, ya fada a wata sanarwar da ya bayar ta shafin sada zumunci cewa jirgin da ya fito daga Malaga a kan hanyar zuwa Madrid shine ya fara kauce ma layin dogonsa a Adamuz, ya fada kan daya layin dogon, ya kara da jirgin da ya taso daga Madrid a kan hanyar zuwa Huelva.
Kamfanin Adif yace hatsarin ya faru da karfe 6:40 na maraicen kasar, kimanin minti 10 bayan da jirgin farko ya bar Cordoba ya doshi Madrid.
Kamfanin Iryo, wanda ya mallaki jirgin kasan ya bayyana jimami da mummunan takaicin abinda ya faru, ya kuma kaddamar da shirinsa na gaggawa da yin aiki tare da hukumomin da abin ya shafa wajen tinkarar wannan lamari.
