Wakilin kasuwancin kasa da kasa na Amurka Jamieson Greer ya ce shawarar da gwamnatin kasar Canada ta yanke na barin a shigo da motoci masu amfani da wutar lantarki 49,000 kirar kasar China a haraji me sauki yana da matsala, kuma Canada zata iya yin dana sanin hakan.
Da yake Zantawa da tashar labarai ta CNBC ranar Jumu’a, Greer ya ce abin da ya sa bama sayar da motocin China da yawa a Amurka, shine saboda muna da haraji don bada kariya ga ma’aikatan kamfanonin motoci na Amurka, mu kuma kare Amurkawa daga wadannan motocin.
Ya ce Canada na neman saukin harajin amfanin gona ne, a cikin yarjejeniyar na motocin masu amfani da lantarki, ina ganin nan gaba baza su so kulla wannan yarjejeniya da suka yi ba.
A yau Jumu’a ne Canada da kasar China suka kulla yarjejeniyar kasuwanci da zai rage haraji kan motoci masu aiki da lantarki da man girki na Canola, inda Canadan zata bari a shigo da motocin China masu aiki da lantarki 49,000, kan haraji 6.1 cikin dari.
A farkon makon nan ne shugaban Amurka Donald Trump ya kara jaddada maganar da ya yi lokacin da yake yakin neman zabe a Detroit da ke jihar Michigan cewa zai so masu kera motoci a China su zo Amurka su kera motoci.
