Shugaba Umaro Sissoco Embalo na kasar Guinea-Bissau, yana fuskantar kalubale sosai a zaben shugaban kasar da ake shirin yi a kasar jibi Lahadi, yayin da aka ce kasar tana kara zamowa zangon masu safarar hodar iblis ta Cocaine daga kasashen kudancin amurka.
Babban mai adawa da shi, shine Fernando Dias na jam’iyyar PRS, wanda mutane masu yawa suka fara halartar kyamfe nasa a yayin da yake alkawarin karfafa tsaro da sasantawa da kuma hana sojoji yin katsalanda a harkokin siyasa a wannan kasa da ta saba ganin juye juyen mulkin soja.
Duk da cewa akwai ‘yan takara 12 a wannan zabe na jibi, shugaba Embalo mai shekaru 53 da haihuwa da kuma Dias, sune ake kyautata zaton dayansu zai lashe zaben.
Ana sa ran jin sakamakon farko cikin kwanaki biyu da zaben. Idan babu dan takarar da ya samu fiye da kashi 50 cikin 100 na kuri’u, to za a je ga zagaye na biyu tsakanin ‘yan takara biyu da suka fi samun kuri’u.
A halin da ake ciki, kasar ta Guinea-Bissau, tana kara karfafa matsayinta na muhimmin zangon safarar hodar iblis ta Cocaine da ake daukowa daga kudancin Amurka zuwa kasashen Turai.
Wani masani a faransa yace ana kara samun shaida cewar Guinea-Bissau tana jaddada matsayinta na zangon safarar muggan kwayoyi a yayin da ake kama ‘yan kasar dauke da hodar Iblis ta Cocaine a yankin da kuma a kasashen ketare.
