Hukumar Raya Kogin Benue ta sanar da wani shiri na musamman domin inganta ayyukan noma ga manoma a yankin Dam ɗin Daɗinkowa da ke jihar Gombe a Najeriya
Manajan Daraktan Hukumar, Dr. Mahmud Sanusi Muhammad, ne ya bayyana wannan shiri ne a yayin ƙaddamar da rabon takin zamani mai rangwame, wanda aka tsara domin ƙara yawan amfanin gona a jihar Gombe.
Domin rage barazanar namun daji, musamman giwayen ruwa Dr. Muhammad ya ce hukumar na duba yiwuwar samar musu da abinci a wurare masu nisa da gonakin mutane. Ya ce wannan zai taimaka wajen jawo su daga yankunan noma, tare da kare rayuwar manoma da amfanin gonakinsu.
Bugu da ƙari, Manajan Daraktan ya bayyana cewa ana ci gaba da aikin gyaran hanyoyin ruwa (canals), domin kai ruwa zuwa gonaki masu nisa, wanda hakan zai taimaka wajen bunƙasa noman ban-ruwa a duk tsawon shekara.
Sabon Manajan Yanki, Abubakar Muhammad Bello Sarkin Shanu, ya jaddada cewa shirin takin zamani mai rangwame wanda haɗin gwiwa ne tsakanin hukumar da kamfanoni masu zaman kansu na da matuƙar muhimmanci wajen tabbatar da wadatar abinci a ƙasa.
Ya ce: “A tsarin da ake ciki yanzu, manoma za su biya rabin kuɗin taki kafin karɓa, sannan su biya ragowar bayan girbi ko dai da kuɗi ko da amfanin gona.”
Sarkin Shanu ya ƙara da cewa irin wannan haɗin gwiwa na da muhimmanci, yana mai jaddada cewa dole ne jama’a su daina dogaro da gwamnati kaɗai.
“Dole mu koya yin haɗin gwiwa domin gina abubuwa masu amfani. Idan aka yi la’akari da yadda yawan jama’a da buƙatu ke ƙaruwa, gwamnati kaɗai ba za ta iya biyan dukkan buƙatunmu ba,” in ji shi.
Wakilan kamfanonin haɗin gwiwa, Yero Farms da Wababe Integrated Agric Ventures, wanda Alhaji Nasiru Umar ya wakilta, sun yaba da ƙoƙarin UBRBDA wajen tallafawa manoma. Sun kuma roƙi waɗanda suka amfana da shirin da su kiyaye amana ta hanyar biyan bashin da aka ba su a kan lokaci.
Taron ya kuma samu saƙonnin fatan alheri daga shugabannin al’umma daban-daban, ciki har da Comrade Musa Umar na Dandalin Matasan Hina da kuma Alhaji Sadik Shehu, Shugaban Ƙungiyar Masu Amfani da Ruwa (WUA).
Duk da yabon shirin, sun roƙi a ƙara faɗaɗa hanyoyin ban-ruwa tare da inganta abubuwan more rayuwa, musamman samar da ruwan sha mai tsafta da wutar lantarki mai ɗorewa a yankin Daɗinkowa da maƙwabtanta.
Da take jawabi a madadin waɗanda suka amfana, Mrs. Doris Yakubu, shugabar mata ta WUA, ta bayyana muhimmancin haɗa mata cikin harkokin noma a yankin.
Ta ce mata a Daɗinkowa na taka rawa sosai a fannin noma, kuma ta nuna kwarin gwiwa cewa tallafin takin zamani zai ƙara yawan amfanin gonakinsu.
Ta kuma tabbatar da cewa manoma za su cika alkawarin biyan bashin da aka ba su bayan samun girbi mai kyau.
