Mataimakin Shugaban Majalisar Dattawa, Sanata Barau Ibrahim Jibrin, ya ƙara faɗaɗa gagarumin shirinsa na tallafa wa al’umma, inda ya raba motoci 47 da kuma babura guda 282 ga mazaɓarsa ta Kano ta Arewa.
Wannan tallafi, wanda aka raba wa rukunonin mutane daban-daban a birnin Kano ranar Laraba, na zuwa ne a matsayin wani ɓangare na ƙoƙarin Sanatan na ganin ya inganta rayuwar mutanen da yake wakilta.
Cikin waɗanda suka ci gajiyar wannan tagomashi har da Shugabannin jam’iyyar APC da sakatarorinsu daga ƙananan hukumomi 13 na mazaɓar, Ƙungiyar Shugabannin Makarantun Firamare (Headmasters’ Forum), Shugabannin makarantun sakandare (Principals’ Forum), Da sauran ƙungiyoyin al’umma daban-daban.
Mai Magana da Yawun Mataimakin Shugaban Majalisar Dattawa, Ismail Mudashir, ya bayyana cewa an tsara wannan shiri ne domin magance matsalar sufuri, inganta ayyukan ƙungiyoyin, da kuma ƙarfafa dogaro da kai a tsakanin al’umma.
Malam Salihu Sagir Takai, wanda shi ne Kodinetan Tsarin Renewed Hope a Jihar Kano, ya bayyana a wurin taron cewa wannan yunƙuri na Sanata Barau ya yi daidai da manufofin Shugaba Bola Ahmed Tinubu na inganta jin daɗin ‘yan ƙasa.
Ya ƙara da cewa, “Wannan ba shi ne karon farko da Sanatan yake yin irin wannan ba, kuma ba shi ne na ƙarshe ba.”
Sanata Barau, wanda Babban Jami’in Ma’aikatansa (Chief of Staff), Farfesa Muhammad Ibn Abdullah ya wakilta, ya ce babban burinsa shi ne fitar da mutane daga kangin talauci.
Ya yi kira ga waɗanda suka amfana da kada su kuskura su sayar da waɗannan motoci da babura, maimakon haka su yi amfani da su ta hanyar da za ta riƙa kawo musu kudin shiga da kuma taimaka wa ayyukansu na yau da kullum.
Wannan dai na ɗaya daga cikin jerin shirye-shiryen bunkasa tattalin arziki da Sanatan ya tsara domin mazaɓarsa ta Kano ta Arewa da ma jihar baki ɗaya.
