Majalisar Dokokin Jihar Gombe ta gudanar da taron masu ruwa da tsaki da zaman sauraron ra’ayoyin jama’a na yini guda kan wasu muhimman kudurorin dokoki guda biyu da ke da nufin inganta tsarin kula da muhalli da gandun daji a jihar.
Kudurorin da aka tattauna sun haɗa da kudurin soke Dokar Hukumar Kula da Tsabtace Muhalli ta Jihar Gombe (GOSEPA) ta shekarar 2006, da kuma kudurin soke tare da sake kafa Dokar Gandun Daji ta shekarar 2026 domin samar da ingantaccen tsarin doka na zamani da zai tabbatar da dorewar kula da gandun daji da kare muhalli.
Da yake buɗe taron, Kakakin Majalisar Dokokin Jihar Gombe, Rt. Hon. Abubakar Muhammad Luggerewo, ya yi maraba da mahalarta taron tare da jaddada muhimmancin samar da dokoki ta hanyar bai wa jama’a damar bayar da gudunmawa, yana mai cewa hakan ne zai taimaka wajen samar da dokokin da za su tabbatar da ci gaba mai ɗorewa a jihar.
Shugaban Kwamitin Majalisar da ke kula da kudurorin, Hon. Musa Manaja Zambuk, wanda ya jagoranci zaman, ya ce majalisar ta himmatu wajen tabbatar da cewa sabbin dokokin za su dace da muradu da buƙatun al’ummar Jihar Gombe.
Daga cikin manyan baƙin da suka halarci taron akwai Mai Kula da Aikin ACReSAL, Ambasada Dakta Sani Adamu Jauro; Babban Sakataren Hukumar GOSEPA, Dakta Auwalu Baba Jada; Babban Mataimaki na Musamman ga Gwamnan Jihar Gombe kan Harkokin Muhalli da Kula da Yanayi, Alhaji Mu’azu Garba; Daraktan Gandun Daji, Alhaji Inuwa Ahmed Ba’agale; da Alhaji Abdu, Mataimakin Sakataren Kwamitin Gombe Goes Green (3G).
Taron ya kuma samu halartar wakilan ma’aikatu, hukumomi da cibiyoyin gwamnati, ƙungiyoyin fararen hula, ƙwararru a fannin muhalli, da sauran masu ruwa da tsaki, inda suka gabatar da shawarwari da bayanai kan tanade-tanaden kudurorin domin ƙara inganta su kafin amincewa da su.
Kwamitin Gombe Goes Green (3G) ya kasance cikin mahalarta taron, inda ya bayyana cewa duba da sabunta waɗannan dokoki wani muhimmin mataki ne wajen ƙarfafa kariyar muhalli, bunƙasa juriyar sauyin yanayi, da tabbatar da dorewar kula da albarkatun ƙasa a Jihar Gombe.
Masu ruwa da tsaki sun bayyana cewa sabbin kudurorin sun yi daidai da manufar Gwamnan Jihar Gombe, Muhammadu Inuwa Yahaya, CON, ta sabunta tsofaffin dokokin muhalli, ƙarfafa hukumomin da ke kula da harkokin muhalli, da kuma tabbatar da amfani da albarkatun ƙasa ta hanyar da za ta amfani al’ummomin yanzu da masu zuwa.
Sun kuma bayyana cewa idan aka amince da waɗannan dokoki, za su taimaka wajen samar da muhalli mai tsafta, kare gandun daji daga lalacewa, da kuma inganta ci gaba mai ɗorewa a fadin Jihar Gombe.
