Hukumar Raya Yankin Arewa maso Gabashin Nijeriya (NEDC) ta ce tana shirin samar da kekunan adai-daita sahu masu amfani da wutar lantarki guda 10,000, motocin haya masu amfani da wutar lantarki guda 300, da manyan motocin bas masu amfani da wutar lantarki guda 30 domin inganta sufuri da samar da ayyukan yi a yankin.
Mai kula da ayyukan hukumar ta NEDC, Mohammed Alkali, ne ya bayyana hakan a wani taron wayar da kan masu ruwa da tsaki kan sufuri mai amfani da wutar lantarki da aka gudanar a Jalingo, babban birnin Jihar Taraba.
Taken taron shi ne, “Samar da Makamashi a Arewa maso Gabas: Rungumar Sufuri Mai Amfani da Wutar Lantarki Domin Samar da Muhalli Mai Tsabta, Ingantaccen Tsari da Wadata.”
Shi ma da yake jawabi, Babban Daraktan Kamfanin Attahir Enterprises, Bunu Abatcha, ya ce sufuri mai amfani da wutar lantarki na da damar taimakawa wajen magance matsalolin sufuri da samar da sabbin hanyoyin samun kuɗin shiga a yankin.
Abatcha ya jaddada buƙatar samar da tsari mai ɗorewa da zai tabbatar da kula da motocin yadda ya kamata, samar da kuɗaɗen gudanarwa da kuma bai wa masu ruwa da tsaki damar cin moriyar shirin na dogon lokaci.
Ya ce shirin ya yi daidai da ajandar Shugaba Bola Ahmed Tinubu ta Renewed Hope da kuma Babban Tsarin Samar da Zaman Lafiya da Ci Gaban Arewa maso Gabas, wanda ya bayyana sufuri a matsayin muhimmin ginshiƙi wajen bunƙasa yankin.
Abatcha ya kuma yi kira da a ƙara sa hannun kamfanoni masu zaman kansu wajen samar da kuɗaɗen gudanarwa, tafiyar da harkokin motocin da kuma kula da su, yana mai cewa haɗin gwiwa tsakanin ɓangarori daban-daban shi ne mabuɗin nasarar shirin.
