Ranar Asabar, Rusha da Ukraine sun tashi daga shawarwarin neman kawo karshen yakin tsakanin su, a zaman da Amurka ta shiga tsakani aka yi a Abu Dhabi, ba tare da an cimma wata yarejeniya ba, da Rasha ta kai hari Ukraine cikin dare wanda ya jefa mutane fiye da milyan daya cikin duhu yayinda kasar take cikin matsanancin sanyin hunturu.
Sanarwar da aka bayar bayan taron, bai nuna an cimma wata yarjejeniya ba, amma hukumomi a Moscow da kuma Kyiv duk sunce a shirye suke a yi zaman shawarwari nan gaba.
A sakon da ya wallafa a dandalin sada zumunta, shugaba Volodymyr Zelensky na Ukraine, yace sakamakon zaman da aka yi duka sassan biyu sun amince su koma su gayawa shugabannin kasashen abubuwa da aka tattauna akai, da zummar tsara shawarwari na gaba. Ya kara da cewa za’a sake zama watakil cikin mako mai zuwa.
Wani kakain gwamnatin hadaddiyar daular Larabawa, yace a karon farko jami’an Rasha da Ukraine sunyi ido hudu abunda yayi wuya a tsawon kusan shekaru hudu da fara wannan yaki, bayanda Rasha ta aukawa ukraine.
