Ma’aikatar Lafiya ta jihar Gombe, tare da haɗin gwiwar Hukumar Kula da Lafiyar Matakin Farko ta jihar, ta ƙaddamar da gangamin kawar da cutar Tetanus ga mata masu juna biyu da jarirai, wato Maternal and Neonatal Tetanus Elimination — MNTE.
Gangamin na da nufin ragewa tare da kawar da cutar Tetanus da ke barazana ga lafiyar mata da jarirai, ta hanyar gudanar da allurar rigakafi da kuma wayar da kan al’umma kan hanyoyin kariya daga cutar.
Da yake gabatar da jawabin maraba a wajen ƙaddamar da gangamin, Daraktan Kula da Cututtuka na Ma’aikatar Lafiya ta jihar, Dr Mustapha Musa Abdullahi, ya yaba wa mahalarta taron da hukumomin da suka haɗa hannu wajen ganin an kawar da cutar Tetanus ga mata da jarirai.
Ya ce haɗin kan hukumomi da al’umma na da matuƙar muhimmanci wajen cimma nasarar kawar da cutar, musamman ta hanyar tabbatar da samun rigakafi da ci gaba da wayar da kan jama’a.
A nasa ɓangaren, wakilin Hukumar Kula da Lafiyar Matakin Farko ta Ƙasa, NPHCDA, Umar Shehu Ahmad, ya tabbatar da cewa hukumar za ta ci gaba da bai wa jihar Gombe cikakken goyon baya da haɗin kai domin tabbatar da nasarar shirin.
Ya kuma yi kira da a tabbatar da dorewar irin wannan gangami domin samun cikakkiyar nasara wajen kawar da cutar.
Shi ma wakilin Hukumar Lafiya ta Duniya, WHO, Dr Abdulganiyu Giwa, ya buƙaci mata masu shekaru tsakanin 15 zuwa 49 da su ba ma’aikatan lafiya cikakken haɗin kai domin amfana da shirin.
Ya ce haɗin kan mata da sauran al’umma zai taimaka wajen kare mata da jarirai daga illolin cutar.
A nata jawabin, wata mai ba da shawara daga Ƙungiyar Kiwon Lafiyar Kiristoci ta Najeriya, CHAN, Emily Madina, ta yi kira ga makarantu da iyalai da su taimaka wa ma’aikatan lafiya wajen gano tare da kai wa mata da aka yi wa shirin niyya.
Tun da farko, Jami’in Rigakafi na jihar, Abdulkarim Aliyu, ya bayyana nasarorin da jihar ta samu a fannin rigakafi, tare da bayyana wasu ƙalubalen da ke kawo cikas ga shirin, ciki har da ƙarancin ƙwararrun masu taimaka wa mata haihuwa a wasu yankunan jihar.
A nasa jawabin, Sakataren Zartarwa na Hukumar Kula da Lafiyar Matakin Farko ta Jihar Gombe, Dr Abdulrahman Shuaibu, ya bayyana cewa za a gudanar da gangamin a ƙananan hukumomi biyar na jihar.
Ya lissafa ƙananan hukumomin da suka haɗa da Shongom, Billiri, Kwami, Nafada da Funakaye.
Dr Shuaibu ya yi kira ga iyaye da masu kula da yara da su bai wa ma’aikatan lafiya cikakken goyon baya da haɗin kai yayin gudanar da shirin.
Ya kuma tabbatar wa al’umma cewa allurar rigakafin tana da aminci, ba ta cutarwa, tare da kira ga jama’a da su yi amfani da damar da aka samar domin kare mata da jarirai daga cutar Tetanus.
Hukumomin lafiya sun ce haɗin gwiwar al’umma, makarantu, iyalai da sauran masu ruwa da tsaki zai taimaka wajen cimma burin kawar da cutar Tetanus ga mata da jarirai a jihar Gombe.
