Jam’iyyar PDP, ta ce za ta bi hukuncin Kotun Tarayya da ke zamanta a Gombe, wanda ya soke zaben fidda gwani da jam’iyyar ta gudanar a baya domin fitar da ɗan takararta na gwamnan jihar, tare da umartar ta da ta sake gudanar da sabon zabe.
Sakataren Yaɗa Labarai na Ƙasa na jam’iyyar, Malam Jungudo Haruna Mohammed, ne ya bayyana hakan a cikin wata sanarwa, inda ya ce PDP za ta nazarci hukuncin kotun tare da ɗaukar matakan gaggawa domin tabbatar da cikakken bin umarnin da kotun ta bayar.
Ya ce jam’iyyar na nan daram kan ƙa’idodin dimokuraɗiyyar cikin gida, bin ƙa’ida, adalci da kuma kiyaye kundin tsarin mulkinta, ƙa’idojin zaɓen fidda gwani da kuma dokokin Tarayyar Najeriya.
Jungudo ya ce jam’iyyar za ta fara matakan da suka dace domin gudanar da sabon zaben fidda gwani na takarar gwamnan Gombe, bisa umarnin kotun.
Ya ƙara da cewa za a sanar da ranar gudanar da zaben, jadawalin ayyukan da sauran bayanai ga dukkan masu neman takara, masu ruwa da tsaki, mambobin jam’iyyar da kuma sauran jama’a da zarar an kammala shirye-shiryen.
Jam’iyyar PDP ta kuma yi kira ga mambobinta, magoya bayanta da masu ruwa da tsaki a jihar Gombe da su kasance cikin nutsuwa, su kiyaye doka tare da ci gaba da kasancewa cikin haɗin kai yayin da jam’iyyar ke ɗaukar matakan aiwatar da hukuncin kotun.
