Iran da Amurka sun cimma matsaya a Jiya Talata kan muhimman abubuwan da suka jibanci tattaunawar su don warware rikicin da suka dade suna yi tsakanin su kan Shirin nukiliya na Iran, amma wannan baya nufin za’a cimma matsaya nan da lokaci kankani a cewar ministan harkokin wajen Iran Abbas Araqchi.
Farashin danyen man fetur samfurin oil futures ya fadi, yayin da ma’aunin kwangilar danyen man fetur na Brent ya yi kasa da fiye da kashi 1 cikin 100, bayan bayanin minista ya dan sassauta fargabar da ake yi na rikici a gabas ta tsakiya, inda Amurka ta aike da dakarun sojin ruwa don matsawa Iran ta mika wuya.
Wani jami’in Amurka da ya nemi a boye sunan sa yace Iran zata kawo cikakkiyyar matsaya daki-daki a makonni biyu masu zuwa domin cike gibi da aka samu a tattaunawar kan makamashin nukiliya. Yace an samu ci gaba, amma akwai abubuwa da yawa da ya kamata a tattauna a kai.
