Mutane biyar sun halaka a Ukraine wasu 19 kuma suka ji rauni sakamakon wani harin da Rasha ta kai da jirgin da bashi da matuki akan wata kasuwa a wani gari dake daf da fagen yakin kasar da Rasha da ake kira Nikopol a ranar Asabar, kamar yadda wata sanarwa daga ofishin babban lauyan gwamnatin kasar tayi bayani.
Garin Nikopol, mai tazarar ‘yan kilomitoci daga yankin kasar da Rasha ta mamaye dake kan gabar kogin da ake kira Dnipro, ya dade yana fuskantar hare hare daga Rasha.
“Wannan harin wani kari ne kan laifuffukan yaki da Rasha ta ke aikatawa,” inji sanarwar da ofishin babban lauyan gwamnatin kasar ya fitar.
Ahalinda ake ciki kuma, wani hadimin shugaba Volodimyr Zelensky na Ukraine, yace akwai yiwuwar jakadun Amurka na musamman Steve Whitkoff, da Jared Kushner, za su ziyarci Kyiv cikin watan nan, a wani yunkuri na sake farfado da shawarwarin sulhu da Rasha, wanda ya tsaya, sakamakon barkewar yakin hadin guiwar Amurka da Isra’ila suka kaddamar kan Iran.
