Masu sauraron GTA Hausa Amurka ke Magana, barkanmu da dawowa sabon shirin Ga Fili Ga Doki da ke kawo muhawara tsakanin masu hamayya da juna kan siyasa da muhimman lamuran rayuwa. A shirin da ya gabata mun shiga jam’iyyar APC mai mulki da sabuwar lemar adawa jam’iyyar ADC. Shin wane shiri jam’iyyun biyu ke yi don babban zaben 2027.
Duk da ADC na cewa sauya shekar wasu gwamnoni daga adawa zuwa APC ba wani tasirin da zai yi a babban zaben, amma ficewa daga NNPP da gwamnan Kano Abba Kabir Yusuf ya yi ya kawo muhawara mai yawa. Yayin da a ke karfafa zai shiga APC ne, za a jira a ga yadda maigidansa Sanata Rabiu Musa Kwankwaso zai yi kan lamarin shin da hannunsa a ciki ko matsayarsa na nan ta kin bin kowane bangare kamar yadda ya ambata a baya.
