Hukumar Zaɓe Mai Zaman Kanta ta Ƙasa a Najeriya wato (INEC) ta sanar da tsawaita aikin Rijistar Masu Zaɓe (Continuous Voter Registration CVR) na tsawon mako biyu domin bai wa ƙarin ‘yan Najeriya masu cancanta damar yin rajista kafin zaɓuɓɓuka masu zuwa.
Hukumar ta bayyana cewa an ɗauki wannan mataki ne bayan kiraye-kirayen da jama’a suka yi na ƙarin lokaci saboda wasu ba su samu damar kammala rajistarsu ba kafin wa’adin farko ya ƙare.
INEC ta kuma ƙara da cewa ta samar da tsarin yin rajista ta yanar gizo ga sabbin masu rajista domin sauƙaƙa aikin da rage cunkoso a cibiyoyin rajista.
Hukumar ta buƙaci duk ‘yan Najeriya da suka kai shekara 18, da masu son canja wurin rajistarsu, gyara bayanansu ko neman sabon Katin Zaɓe na Dindindin (PVC) saboda ɓacewa ko lalacewa, da su yi amfani da wannan ƙarin lokacin.
INEC ta sake jaddada aniyarta ta gudanar da sahihin zaɓe tare da ƙarfafa duk masu cancanta su kammala rajistarsu kafin sabon wa’adin ya cika.
