Shugaban rundunar sojojin Uganda Muhoozi Kainarugaba ya musanta zargin da dan jam’iyyar adawa Bobi Wine ya yi, na cewa sojoji sun kai wa matar sa hari lokacin da suka je samame gidan sa cikin dare.
Wine, wanda sunan sa na gaske shi ne Robert Kyagulanyi, ya yi ikirarin cewa sojoji sun shiga gidan sa da tsakar dare, a unguwar Magere da ke wajen garin Kampala, suka ci zarafin ma’aikatan sa, kuma suka shake matar sa, Barbara Kyagulanyi, abinda ya kai har sai da ta je asibiti neman magani.
Wine, da ya shiga buya tun bayan gudanar da zaben da ya ke kalubalanta, yace baya gida a lokacin da abin ya faru.
Kainarugaba, wanda da ne ga shugaban kasar uganda, Yoweri Museveni, ya yi watsi da wannan zargi, a wani sako da ya wallafa a shafin sada zumunta na X, inda ya ce sojoji basa dukan mata. Ya kara da cewa, bamu da lokacin su, muna neman matsoracin mijin ta ne ba ita ba.
Bobi Wine, wanda da mawaki ne ya koma dan siyasa, ya zargi dakarun tsaron Uganda da cin zarafi tun bayan gudanar da zaben shugaban kasa ranar 15 ga Watan Janairu, wanda Yoweri Museveni ya yi nasarar lashewa da kashi 71.6 cikin 100 na kuri’un da aka jefa. Wine, wanda ya zo na biyu ya ki yarda da sakamakon zaben da yake ganin an tafka magudi.
Ba’a samu sahihin dalilin da ya sa sojoji ke neman Wine ba.
