Shugaba Donald Trump na Amurka yace zai taimaka wajen kawo karshen yakin da ake yi a kasar Sudan, a bayan da Yarima mai jiran gado na Sa’udiyya, Muhammad bin Salman, ya roke shi da ya sa baki a lamarin.
Shugaba Trump ya fada wajen wani taron zuba jari a Sa’udiyya jiya Laraba, cewa minti 30 a bayan da yariman na Sa’udiyya ya roke shi a lokacin ganawarsu ta ran Talata, gwamnatinsa ta fara daukar matakan ganin an kawo karshen yakin na Sudan.
Daga bisani shugaba Trump ya fada a wani rubutun da yayi a kafar sada zumunci cewa Amurka zata yi aiki tare da Sa’udiyya da Hadaddiyar Daular Larabawa, da Masar da wasu kasashen na yankin Gabas ta Tsakiya domin kawo karshen zub da jini da daidaita al’amura a kasar Sudan.
Yarima bin Salman yayi amanna da cewa ana bukatar sa bakin shugaba Trump kai tsaye domin karya lagon cijewar da aka samu a tattaunawar kawo karshen wannan yaki da aka shafe shekaru biyu da rabi ana yi.
Warware wannan rikici na Sudan yana da matukar muhimmanci ga tsaron kasar Sa’udiyya a saboda iyaka mai tsawon daruruwan kilomitoci da tekun Bahar Maliya ta bi ta raba a tsakaninta da Sudan.
