An buƙaci ‘yan jarida da su taka muhimmiyar rawa wajen inganta rahotannin zaɓe cikin harsunan ƙasa daban-daban, domin rage matsalolin fassara, yaɗa labaran ƙarya da tabbatar da cewa kowane ɓangare na al’umma ya samu sahihin bayanai gabanin babban zaɓen shekarar 2027 a Najeriya.
An bayyana hakan ne a yayin wani horon kwanaki uku da aka shirya wa ‘yan jarida a kan dabarun ƙarfafa ƙwarewa, jagoranci da bunƙasa fasahohi wajen yaƙi da yaɗa bayanan ƙarya, tantance sahihancin labarai da kuma amfani da basirar na’ura mai kwakwalwa (AI).
Taron wanda ya samu halartar ‘yan jarida daga jihohin Arewacin Najeriya da suka haɗa da Filato, Benuwai, Taraba, Katsina, Abuja, Yola, Kano, Bauchi da Kaduna, da sauransu, an gudanar da shi ne a Comfort Hub Hotels and Suites, Nassarawa GRA, a jihar Kano Najeriya
An shirya horon ne a ƙarƙashin shirin tallafawa ECOWAS kan zaman lafiya, tsaro da shugabanci (EPSG), tare da goyon bayan Tarayyar Turai (EU), Ma’aikatar Harkokin Waje ta Denmark da kuma Ƙungiyar Haɗin Kan Ƙasashen Jamus.
Ɗaya daga cikin muhimman batutuwan da aka tattauna a horon shi ne gibin da ake da shi wajen amfani da basirar na’ura mai kwakwalwa (AI) a harsunan ƙasa, musamman ƙarancin bayanan da ake da su a yanar gizo, bambancin yarukan yanki, kura-kuran gane magana da kuma rashin fahimtar al’adu.
An kuma jaddada cewa bayanan ƙarya na iya yaɗuwa cikin sauri ta harsunan da al’umma suka saba da su, musamman ta hanyoyin sadarwa da mutane suka amince da su, yayin da yawancin binciken tantance sahihancin labarai ake wallafawa da Turanci a shafukan yanar gizo, wanda hakan ke hana saƙon kaiwa ga ainihin mutanen da suka fara karɓar labarin ƙaryar.
A ƙarshe, an buƙaci mahalarta horon da su yi amfani da ilimin da suka samu wajen rage matsalolin harshe, ƙarfafa amfani da harsunan ƙasa wajen yaɗa sahihan bayanai, da kuma tabbatar da samun damar sadarwa, amincewa, bayar da shawarwari da kuma halartar kowane ɓangare na al’umma a harkokin jarida.
An bayyana cewa hakan zai taimaka wajen ƙarfafa aikin jarida da tabbatar da cewa dukkan al’ummomi sun samu sahihan bayanan zaɓe cikin harshen da suka fahimta gabanin babban zaɓen Najeriya na shekarar 2027.
