Kasar Iceland ta shiga cikin sahun kasashen Turai da zasu kaurace ma bikin gasar wakoki na Eurovision na shekara mai zuwa, bayan Kungiyar Masu Watsa Shirye ta Turai ta yarda zata kyale kasar Isra’ila ta shiga gasar.
Tun da fari shawarar kyale kasar Isra’ila ta shiga gasar Eurocision da za ayi cikin watan Mayu a Vienna ta kasar Austria, ta sa kasashen Spain, Netherlands, Ireland da kuma Slovenia sun janye daga shiga wannan gasa a saboda nuna rashin yarda da abubuwa da Isra’ila ta aikata a zirin Gaza.
Darakta janar na hukumar yada shirye-shirye ta kasar Iceland, Stefan Eiriksson, yace ganin irin muhawarar da al’ummar Iceland ke yi da kuma martaninsu ga shawarar kyale Isra’ila ta shiga cikin gasar, babu wani abin faranta rai ko kwanciyar hankali ga hukumar yada labarai ta kasar ta shiga cikin wannan gasa.
Iceland tana daga cikin kasashen da suka bukaci a jefa kuri’a tsakanin membobin kungiyar masu watsa shirye shirye ta Turai a kan batun shigar Isra’ila cikin gasar a makon jiya, amma sai kungiyar ta ki yarda da wannan, ta ce a maimakon haka ta fito da sabbin dokokin da zasu hana gwamnatoci yin katsalandan a gasar.
An fara gudanar da gasar Wakoki ta Eurovision tun a shekarar 1956, kuma a cewar kungiyar mutane miliyan 160 ke kallon gasar a akwatunan telebijin dinsu.
