Rundunar ‘Yan Sandan jihar Bauchi a Najeriya ta kama wani mutum mai suna Baffaji Abba mai shekaru 28, bisa zargin yi wa ‘yarsa ta cikinsa mai shekaru takwas fyaɗe a ƙaramar hukumar Alkaleri.
A cikin wata sanarwa da jami’in hulɗa da jama’a na rundunar, SP Nafiu Habib ya fitar, ya bayyana cewa wani ɗan’uwan wanda ake zargin, Baffaji Muhammed, wanda ke zaune a adireshi ɗaya da shi, ne ya kai rahoto zuwa ofishin ‘yan sanda na Alkaleri a ranar 31 ga Disamba, 2025.
Rahoton ya ce lamarin ya faru ne a ranar 30 ga Disamba, 2025, inda wanda ake zargin ya yaudari yarinyar zuwa bandaki sannan ya tilasta mata mu’amala ta jima’i ta hanyar farji da dubura har sau da dama a rana ɗaya, ba tare da amincewarta ba.
Da rundunar ta samu rahoton, tawagar jami’an bincike ƙarƙashin jagorancin CSP Kadiri Danjuma, DPO na Alkaleri, suka je wajen da abin ya faru, suka kai yarinyar asibitin gwamnati na Alkaleri domin samun kulawar gaggawa, sannan suka kama wanda ake zargin.
Yayin bincike, wanda ake zargin ya amsa laifin da aka tuhume shi nan take.
Kwamishinan ‘yan sanda na jihar, CP Sani-Omolori Aliyu, ya umurci Mataimakin Kwamishinan ‘yan sanda mai kula da sashen binciken manyan laifuka (SCID) da ya gudanar da cikakken bincike mai zurfi bisa shaidu da hujjoji.
Ya jaddada kudurin rundunar na ganin an tabbatar da adalci kuma za a gurfanar da wanda ake zargin a gaban kotu da zarar an kammala bincike.
