Bankuna a Najeriya sun bayar da rahoton karuwar rashin biyan bashi a daga magidanta da kamfanoni duk da cewa samuwar rance da bukatar sa sun karu, a cewar binciken yanayin bashi na babban bankin Najeriya (CBN) na zangon karshe na 2025.
Rahoton ya nuna cewa rashin biyan bashi ya karu a dukkan nau’ikan rance, ciki har da rancen dake da jingina da wanda bai da jingina, da kuma na kamfanoni.
Kananan gidaje da kamfanoni kanana sun fi fuskantar matsala saboda hauhawar farashi, tsadar makamashi, da karancin kudin shiga.
A bangaren manyan kamfanoni, rashin biyan bashi ya kai kashi 6% a wasu lokuta, yayin da sauran kamfanonin kudi suka samu matsakaicin rashin biyan bashi na kashi 6.2%, lamarin da ke nuna tsanani a bangarorin tsarin kudi.
Duk da haka, bankuna sun kara bayar da rance ga gidaje da kamfanoni, amma babban bankin Najeriya ya yi gargaɗin cewa karuwar rashin biyan bashi na iya lalata ingancin kadarori da rage karfin bankuna.
CBN ta kuma ba da shawarar inganta tsarin dawo da bashi da kiyaye ka’idojin banki don rage matsalar.
