Wata kotu a Najeriya ta yanke hukumcin daurin rai da rai a gidan kurkuku, a kan madugun kungiyar ‘yan awaren nan ta Biafra, ta kudu maso gabashin Najeriya, Nnamdi Kanu, bayan da ta same shi da dukkan laifuffuka guda 7 da aka tuhume shi da aikatawa da suka shafi ta’addanci.
Mai shari’a Ja’es Omotosho na babbar kotun tarayya dake Abuja, yace masu gabatar da kararraki sun tabbatarwa kotun cewa irin kalamun da yayi da aka watsa ta kafar rediyo da kuma umurnin da yayi ta ba magoya bayan kungiyarsa ta “Indigenous People of Biafra” ko IPOB a takaice, sun haddasa kai munanan hare-hare da suka janyo hasarar rayukan jami’an tsaro da fararen hula.
Wannan zub da jinin wani bangare ne na yunkurin da yake jagoranta na kawowa ga ballewar yankin da mafi yawan al’ummarta ‘yan kabilar Igbo ne. A shekarar 1967, yankin yayi yunkurin ballewa ta hanyar ayyana Jamhuriyar Biafra, abinda ya haddasa yakin basasar shekaru uku, inda mutane fiye da miliyan daya suka mutu.
