A karon farko tun bayan bullar annobar cutar COVID-19, yawan basussukan da kasar China ta bawa kasashen Afirka a shekarar 2024 ya ragu da fiye da rabi zuwa dalar Amurka biliyan 2 da miliyan 100.
Wasu alkaluma da Jami’ar Boston a Amurka ta fitar ranar laraba sun nuna cewa wannan adadin, wanda bai kai ko kashi 10 cikin 100 na rancen dala Biliyan 28 da miliyan 800 da China ta ba kasashen Afirka a shekarar 2016 ba, sun nuna yadda kasar take kaucewa daga manyan ayyuka kamar gina layukan dogo na jiragen kasa da hanyoyin mota, zuwa ga kananan ayyukan da za a iya samun riba daga gare su.
China ta fuskanci hasarar wasu daga cikin kudaden da ta bayar bashi a bayan da koma-bayan tattalin arzikin da ta biyo bayan annobar COVID-19 ta jefa kasashen Zambiya, Ghana da kuma Ethiopia cikin yanayi na kasa biyan basussukan da suka karba.
Haka kuma, binciken jami’ar ya nuna cewa a yanzu China ta daina bayar da basussuka na Dalar Amurka, ta koma ga wadanda ake bayar da su da takardar kudin Yuan na kasarta.
Binciken ya nuna cewa a shekarar 2024 ga misai, duk basussukan da China ta ba kasar Kenya an lissafa su ne da takardar kudin Yuan. Haka kuma a cikin watan Otoba, Kenya ta sauya basussukan dalar Amurka biliyan 3 da rabio da China ke binta, ta maida su suka koma na takardar kudin Yuan.
