Shugaban Hukumar Wasannin Harbi (Shooting Sport) ta Najeriya, Mohammed Shettima, yana neman hadin gwiwa da masu shirya gasar Olympics ta matasa ta Dakar 2026 don bunkasa wasannin Harbi a Najeriya.
A ziyarar da ya kai kwanan nan zuwa Kwamitin Shirya Wasannin Olympics na matasa na Dakar 2026, a Senegal, Shettima, ya samu kyakyawan tarba daga Babbar Daraktar Hulda da Jama’a ta wasanni Madam Fanta Diallo, bangarorin biyu sun tattauna fannoni masu amfani don inganta hadin gwiwa mai zurfi, musamman a fannin bunkasa Wasannin Harbi.
Shugaban NSSF wanda ya hau mulki a ranar 25 ga Satumba, 2025, ya shaida wa wakilin Kwamitin shirya wasannin Olympics na Dakar cewa Najeriya tana da damammaki da yawa a wasanni, musamman a wasannin Harbi, don bunkasa muhimman abubuwan da suka faru a duniya, ya kara da cewa hadin gwiwar zai bude hanyar zuwa ga kwarewar wasanni ta Afirka a fagen wasanni na duniya.
Da take jawabi Madam Fanta ta yi alƙawarin yin aiki kafada da kafada da NSSF da kuma Kwamitin Olympics na Najeriya don cimma fa’idodin juna.
