Gwamnan Jihar Gombe, ya bayar da umarnin rufe dukkan makarantun jihar daga yanzu zuwa ranar Juma’a, 28 ga Nuwamba, 2025.
Shugaban Hukumar ilimi matakin farko a Jihar Gombe, wato SUBEB, Farfesa Esrom Jocthan Toro, ne ya isar da umarnin gwamnan yayin taro da ya gudanar da dukkan Sakatarorin Ilimi na ƙananan hukumomi a ofishinsa.
Farfesa Esrom ya tabbatar da kudirin Gwamna Inuwa Yahaya na ci gaba da kare rayuka da dukiyoyin jama’a, yana mai cewa umarnin rufe makarantu mataki ne na kariya domin kauce wa duk wani lamari marar dadi.
Ya ce dukkan jarabawa za a gudanar da su tsakanin yau da ranar Juma’a 28, tare da kira ga iyaye da kada su shiga damuwa domin gwamnati na ƙoƙarin tabbatar da tsaro yadda ya kamata.
Shugaban SUBEB ɗin ya kuma umarci dukkan Sakatarorin Ilimi da su tanadi duk bayanan da suka shafi makarantun da ke karkashin su, domin kwamitin farfaɗo da makarantun zai fara zagayawa wasu daga cikin makarantun da aka zaɓa domin tantancewa da nazari, kafin a bayar da shawarwari.
