Gwamnatin Kano ta sanar da shirye-shiryen auren gata ga mutane dubu 3,000.
Gwamnatin Jihar Kano, ƙarƙashin jagorancin Abba Kabir Yusuf, ta sanar da wani babban shiri na jin ƙai ga al’umma, inda za ta aurar da mutane dubu 3,000 a lokaci guda, wanda ya ƙunshi maza 1,500 da mata 1,500.
Sanarwar hakan ne ƙunshe cikin wani rubutu da kwamandan Hisbah na jihar Kano Sheikh Aminu Ibrahim Daurawa ya wallafa a Shafinsa na Facebook.
Sheikh Daurawa ya bayyana cewa auren zai fi mayar da hankali ne ga marayu da kuma mutane masu ƙaramin ƙarfi, da nufin taimaka musu wajen gina rayuwar aure mai ɗorewa.
Kwamandan ya ƙara da cewa a cikin Shirin, kowanne ma’aurata za su samu cikakken tallafi, wanda ya haɗa da:
• Kayan ɗaki: gado, madubi, katifa, matasai da zanin gado
• Kayan abinci: shinkafa, taliya (spaghetti) da man girki
• Tufafi: zannuwan Ankara da hijabi ga mata; shadda da hula ga maza
• Sadaki: Naira 100,000 ga kowace amarya
• Tallafin sana’a: Naira 100,000 ga kowace mace domin fara ƙaramar sana’a
•Domin tabbatar da lafiyar masu niyyar shiga da kuma cancantarsu, za a gudanar da gwaje-gwajen lafiya, sannan masu nema za su cika fom guda uku na tantancewa.
Wannan shiri na nuna ƙudurin gwamnati wajen tallafa wa al’umma, rage talauci, da bunƙasa ci gaban jama’a.
