Jerin abubuwan da a ka haramta wa magoya baya su shiga da su filayen wasa lokacin gasar cin kofin kasashen afirka da za’ayi na 2025, a Morocco.
A yayin da ake shirye-shiryen Gasar kwallon kafa mafi girma ta Afirka, AFCON 2025, wadda za ta fara a ranar Lahadi, 21 ga Disamba 2025 wacce Morocco, zata karbi bakunci.
Inda masu masaukin baki Kasar Morocco za su fafata da Comoros a wasan farko a filin wasa na Prince Moulay Abdellah da ke Rabat, za a fara wasan da karfe 8 na dare agogon Najeriya, Nijar Kamaru da Chadi, dai dai da 19:00 na dare agogon GMT.
An gargadi magoya bayan da zasu halarci wasanni game da jerin abubuwan da aka haramta musu shiga da shi filin wasa yayin gasar.
Ba a yarda da wasan wuta, fasahar na’urorin laser, abubuwa masu kaifi, gilashi, da makame ba, har ila yau an haramta shiga da sigari, barasa, da miyagun kwayoyi.
An kuma haramta amfani da kayayyakin da ke dauke da sakonnin batanci da basu dace ba.haka zalika ba za’a bar manyan abubuwa da suka kai santimita 40 a cikin filayen wasa ba.
Wannan ya haɗa da keken motsa jiki, manyan laima, dabbobi, da tutoci masu girma.
An haramta busa, ƙaho, fitilu, ashana, tabarau masu kyamarori na ƙwararru, da kayan rikodi. An haramta amfani da abin rufe fuska, feshi iskar gas, da duk wasu abubuwan da ake ganin yana nuna wariya, cin zarafi, ko kuma siyasa.
Birni shida za su karɓi baƙuncin wasanni a lokacin gasar. An zaɓi Rabat, Casablanca, Marrakech, Agadir, Fès, da Tangier bisa ga ƙa’idodin filin wasa.
Jimillar ƙungiyoyi 24 zasu fafatawa, waɗanda aka raba zuwa rukuni shida mai dauke da ƙungiyoyi huɗu.
