Ƙasar India ta sayi kayanta na farko na iskar gas daga hannun Iran cikin shekaru da dama, bayan da Amurka ta ɗan sassauta takunkumin da ta ƙaƙaba wa Tehran kan man fetur da sauran man da aka tace, kamar yadda bayanan LSEG da wasu majiyoyi uku daga masana’antar suka bayyana.
India ta dakatar da sayen makamashi daga Iran tun shekarar 2019 sakamakon matsin lamba da takunkumin ƙasashen yamma. Bayanai sun nuna cewa tun da farko jirgin ruwan da ke ɗauke da kayan ya nufi ƙasar China.
Jirgin ruwa mai suna Aurora, wanda ke ɗauke da LPG na Iran duk da takunkumi, ana sa ran zai isa nan ba da jimawa ba a tashar jiragen ruwa ta Mangalore da ke yammacin India, kamar yadda majiyoyin suka ce, kuma bayanan LSEG suka nuna.
Ƙasar ta Kudancin Asiya ta fuskanci matsanancin yanayi sakamakon tangardar jigilar makamashi ta mashigar ruwa ta Hormuz, wadda yaƙin da ke tsakanin Amurka, Isra’ila da Iran ya haddasa.
