An harbo jirgin yakin Amurka a sararin samaniyar Iran, kuma an fara aikin ceto wadda tuni yasa aka gano daya daga cikin matuka jirgin bayan da yayi amfani da laimar tsira, kamar yadda wani jami’in Amurka ya gayawa kamfanin dilancin labarai na Reuters, lamari irinsa na farko da aka sani tun bayan kaddamar da yakin wanda yanzu kusan mako biyar ana gwabzawa.
Yanayi da zai sa wani sojan Amurka ya fada hanun abokan gaba zai kasance kalubale ga Amurka, a yakin da kamar yadda kuri’un neman ra’ayin jama’a suka nuna bashi da farin jini a gun Amurkawa.
Jami’an Iran suna kira ga ‘yan kasar su zuba ido ko za su ga wani sojan Amurka da ya tsira, hukumomin sun cika kafofin sada zumunta da abunda suka ce baraguzan jirgin yakin na Amurka ne.
Jami’an Amurka biyu suka ce jirgin samfurin F15E ne, yana da wurin zaman mutum biyu, daya na matukin jirgin, guda kuma na mai harba makamai. Babu tabbas kan wanene daga cikinsu aka ceto ahalin yanzu. Jami’an Amurka da suka bada labarin ceton, ba su yi bayanin yadda aka ceto shi ba.
Ma’aikatar tsaron Amurka da ake kira Pentagon, da kuma cibiyar tafiyar da yake yake ta Amurka, duk biyu basu maida martani ba da aka tuntube su dangane da wannan batu.
