Hukumar taƙi da cin hanci da rashawa ta Najeriya (EFCC) ta kama wani ɗan kasuwa ɗan ƙasar Kamaru bisa zargin damfarar wani banki kuɗin da suka kai kimanin Naira biliyan 1.5.
Wata majiya ta rawaito cewa jami’an reshen EFCC na Legas ne suka kama mutumin mai shekaru 47 a ranar Alhamis a yankin Ikorodu, bayan gudanar da bincike.
Rahotanni sun nuna cewa wanda ake zargin na cikin wata ƙungiyar masu damfara ta ƙasashe daban-daban da ke aikata laifin amfani da katunan banki (credit card fraud).
Binciken EFCC ya gano cewa mambobin ƙungiyar kan buɗe asusun banki a Najeriya, su samu katunan ATM da lambobin sirri (PIN), sannan su tafi wasu ƙasashe makwabta inda suke amfani da katunan wajen aikata zamba a kan asusun kwastomomi masu kuɗi.
Hukumar ta ce za ta gurfanar da wanda ake zargin a gaban kotu da zarar an kammala bincike.
