Mambobin Majami’ar ECWA Gospel da ke kan titin Ashaka a jihar Gombe na ci gaba da tantance irin asarar da suka yi bayan wata gobara ta tashi ta lalata babban zauren cocin.
Gobarar, wadda ta faru a daren Talata, 7 ga Yuli, ta ƙone mimbari, dandalin mawaƙan coci, kayan kiɗa, kayan gudanar da ibada, rufin cikin gini (ceiling), rufin sama da sauran kadarorin cocin.
Shaidun gani da ido sun bayyana cewa bayan an kammala nazarin Littafi Mai Tsarki da misalin ƙarfe 6:00 na yamma, an rufe Majami’ar kamar yadda aka saba.
Sai dai da misalin ƙarfe 8:00 na dare, jami’in tsaron cocin ya hango hayaƙi na tashi daga saman ginin yayin da yake bakin aikinsa. Bayan ya je ya duba, ya tarar da cewa babban zauren cocin ya cika da hayaƙi, lamarin da ya sa ya gaggauta sanar da Faston da ke kula da cocin da kuma sauran mambobin coci.
Nan take mambobin cocin suka hallara domin dakile gobarar kafin ta bazu zuwa sauran sassan ginin.
Mazauna yankin tare da mambobin cocin sun haɗa kai wajen kashe gobarar, yayin da jami’an Hukumar Kashe Gobara ta Jihar Gombe suka isa wurin da manyan motocin kashe gobara guda huɗu, inda daga bisani suka yi nasarar shawo kan gobarar.
Faston da ke kula da Majami’ar, Rabaran Dakta Gideon Danbauchi, ya gode wa Allah da cewa babu wanda ya rasa ransa sakamakon gobarar.
Ya bayyana lamarin a matsayin babban ƙalubale, amma ya ce cocin na da cikakken ƙwarin gwiwa da imani cewa za a sake gina sashen da gobarar ta lalata.
Rabaran Danbauchi ya kuma yaba wa Hukumar Kashe Gobara ta Jihar Gombe da mazauna yankin saboda gaggawar da suka yi wajen taimakawa domin hana gobarar yaɗuwa.
Ya yi kira ga mambobin cocin, masu fatan alheri da al’ummar Kirista da su ba da gudummawa domin taimakawa wajen gyaran cocin.
Daraktan Fasaha na cocin, Mista Olatunji Daniel, ya ce ya samu labarin gobarar ne bayan ya ga hayaƙi mai yawa yana tashi sama tare da samun kiran gaggawa daga mutanen da ke kusa da cocin.
Ya ce lokacin da ya isa wurin, an riga an kulle cocin, lamarin da ya tilasta wa masu agaji fasa tagogi domin shiga su kashe gobarar, amma ƙarfin wutar ya fi ƙarfinsu.
Ko da yake har yanzu ba a tabbatar da musabbabin gobarar ba, shaidun gani da ido na zargin cewa matsalar wutar lantarki ce ta haddasa tashin gobarar.
Har yanzu ana ci gaba da tantance cikakken girman asarar, amma kiyasin farko ya nuna cewa darajar kayan da gobarar ta lalata na iya haura Naira miliyan 100.
