Shugaban Ƙasa, Bola Ahmed Tinubu, ya yi kira ga Ƙungiyar Raya Tattalin Arzikin Ƙasashen Yammacin Afirka (ECOWAS) da ta ɗauki tsauraran matakai kan ci gaba da hare-haren ƙyamar baƙi da ake kai wa ‘yan Najeriya da sauran ‘yan Afirka a ƙasar Afirka ta Kudu.
Tinubu ya bayyana hakan ne ta bakin Mataimakin Shugaban Ƙasa, Kashim Shettima, yayin taron shugabannin ECOWAS karo na 69 da aka gudanar a birnin Freetown na ƙasar Saliyo.
Ya ce ya zama dole ECOWAS ta gabatar da batun a gaban Ƙungiyar Tarayyar Afirka (AU), domin a ɗauki matakin gaggawa kan hare-haren da ke barazana ga rayuka da dukiyoyin ‘yan Afirka.
Shugaban ya ce gwamnatin Najeriya ta yi Allah wadai da hare-haren, tana mai bayyana cewa ci gaba da yin shiru ta fuskar diflomasiyya kan irin waɗannan abubuwa na iya ƙarfafa masu aikata su.
A cewarsa, gwamnatin tarayya ta kwashe sama da ‘yan Najeriya 1,490 daga Afirka ta Kudu ta hanyar jigilar jirage bakwai domin kare rayukansu sakamakon rikice-rikicen.
Rahotanni sun nuna cewa Najeriya na tattaunawa da Ghana domin haɗa kai wajen matsa wa Tarayyar Afirka lamba ta ɗauki matakin hukunta Afirka ta Kudu kan ci gaba da hare-haren ƙyamar baƙi.
An bayyana cewa hare-haren ba ‘yan Najeriya kaɗai suka shafa ba, har ma da dubban ‘yan wasu ƙasashen Afirka da ke zaune da aiki a Afirka ta Kudu.
A wani ɓangaren kuma, Shugaba Tinubu ya sake jaddada aniyar Najeriya na goyon bayan shirin ECOWAS Compact for the Future of Regional Integration, wanda ke da nufin ƙarfafa haɗin kan ƙasashen yankin, inganta shugabanci nagari, bunƙasa kasuwanci tsakanin ƙasashe, da samar da kasuwar hada-hadar yanar gizo guda ɗaya domin faɗaɗa damar ayyukan yi ga matasa.
Ya ce tabbatar da shugabanci nagari da kare rayuka da haƙƙin ‘yan Afirka su ne manyan ginshiƙan samar da zaman lafiya da ci gaban nahiyar.
