Hukumar Kashe Gobara ta Tarayya reshen jihar Gombe, ta sake jaddada aniyarta ta ƙarfafa haɗin gwiwa da Hukumar Kashe Gobara ta jihar Gombe, domin inganta rigakafin gobara, shirin tunkarar aukuwarta da kuma gaggawar kai ɗauki, gabanin lokacin Harmattan na shekarar 2026.
Hukumar ta bayyana hakan ne yayin da ta karɓi Daraktan Hukumar Kashe Gobara ta jihar Gombe, Mista Idi Musa Kwami, tare da tawagarsa, a ziyarar ban-girma da suka kai hedikwatar hukumar ta tarayya da ke Gombe.
Manufar ziyarar ita ce ƙarfafa kyakkyawar alaƙar da ke tsakanin hukumomin biyu, inganta haɗin kai wajen gudanar da ayyuka, tare da samar da dabarun tunkarar ƙarin haɗarin aukuwar gobara da ake samu a lokacin Harmattan.
Da yake karɓar baƙuncin tawagar a madadin Kwanturola na Jiha, DCF Suleiman Mohammed Suleiman, Shugaban Sashen Kula da Ma’aikata (HRM), DSF Isah Mohammed Lamido, ya tabbatar wa tawagar cewa hukumar a shirye take ta haɗa kai da Hukumar Kashe Gobara ta Jihar Gombe da sauran masu ruwa da tsaki, domin samar da jihar Gombe mai cikakken shiri da kariya daga haɗarin gobara.
Ya jaddada muhimmancin haɗin gwiwa, musayar bayanai, wayar da kan jama’a da kuma tsara hanyoyin kai ɗauki cikin haɗin kai, domin rage aukuwar gobara da kuma kare rayuka da dukiyoyin al’umma a faɗin jihar.
Jami’in kula da harkokin ma’aikata ya kuma yi amfani da wannan dama wajen gayyatar Hukumar Kashe Gobara ta Jihar Gombe domin ta taka rawar gani a Makon Wayar da Kan Jama’a kan Kariyar Gobara na shekarar 2026, wanda aka tsara gudanarwa daga ranar 2 zuwa 6 ga watan Nuwamba, 2026.
An tsara wannan gangami ne domin wayar da kan jama’a kan hanyoyin rigakafin gobara da matakan kariya, musamman ganin yadda lokacin Harmattan ke ƙara haɗarin aukuwar gobara.
Wannan haɗin gwiwa ya nuna irin aniyar hukumomin biyu na samar da muhalli mai aminci ta hanyar ɗaukar matakan rigakafin gobara tun da wuri, ilmantar da jama’a da kuma inganta tsarin gudanar da ayyukan gaggawa.
Saboda haka, Hukumar Kashe Gobara ta Tarayya, reshen jihar Gombe, ta yi kira ga mazauna jihar, ‘yan kasuwa, cibiyoyi da sauran masu ruwa da tsaki da su rungumi matakan kariya daga gobara, tare da yin aiki tare wajen hana aukuwar gobara a lokacin Harmattan da ma bayan sa.
Kariya daga gobara nauyin kowa ne.
A kasance cikin shiri, a hana gobara, a kare rayuka da dukiyoyi.
