Ma’aikata a kasar Masar sun fara harhada wani tsohon jirgin ruwan kwale-kwale na wani fir’auna da ya mulki daular dubban shekaru da suka shige.
Ma’aikata sun fara harhada wannan kwale-kwale a bainar jama’a a sabon makeken dakin kayan tarihi na Masar ranar talata da safe, yayin da ‘yan yawon bude ido suka tsaya su na kallo.
Wannan kwale-kwale mai tsayin mita 42, na wani fir’auna ne, ko sarki, na masar mai suna Khufu, kuma shugaban sashen gyarawa da farfado da kayan tarihi Issa Zeidan yace zasu dauki shekaru hudu suna wannan aiki na sake hada wannan kwale-kwale baki dayansa, yace jirgin ya kunshi katako dai-dai har guda 1650.
Sarki Khufu ya mulki Daular Masar shekatu 4500 da suka shige, kuma shine ya gina babbar dalar nan ta Giza.
Minsitan yawon shakatawa da kula da kayayyakin tarihi na Masar, Sherif fathy, yace wannan aiki yana daya daga cikin ayyukan sake farfado da wani abu na tarihi mafi muhimmanci a wannan karni.
A watan da ya shige aka bude wannan gagarumin dakin ajiye kayayyakin tarihi na Masar wanda aka gina a kan kudi dala maitan dubu 1, inda kuma ake kokarin sake harhada wannan kwale-kwale, kuma aikin tarihin yana dauke da kayayyaki kusan dubu 50, cikinsu har da kayayyakin da aka samo daga cikin kabarin sanannen Fir’aunan nan mai suna Tutankhamun wanda aka gano a shekarar 1922.
Wannan kwale kwale da ake kokarin sake harhadawa yana daga cikin wasu guda biyu da aka gani a shekarar 1954 a gefen bangaren kudu na Dalar Giza, an fara tono shi daga inda yashi ya binne shi a shekarar 2014.
