Karamar Sallah: Hukumar Kashe Gobara Ta kasa Reshen Jihar Gombe, Ta Fidda Jawabai Domin Kare Lafiyar Al’umma.
Shugaban Hukumar Kashe Gobara ta Tarayya reshen jihar Gombe, DCF Suleiman Mohammed Suleiman, ya taya al’ummar Musulmi murnar kammala azumin watan Ramadan, tare da kira ga mazauna jihar da su gudanar da bukukuwan Sallah cikin kulawa da tsaro.
Kwarewa ta nuna cewa a lokutan bukukuwa ana yawan samun aukuwar gobara da wasu hatsarori da za a iya kaucewa, sakamakon karuwar ayyuka a gida da kasuwanci. Saboda haka, Hukumar na kira ga jama’a da su dauki matakan kariya a kowane lokaci.
Ana shawartar mazauna da su kula da yadda suke sarrafa silinda na gas da kayan lantarki, su guji barin girki ba tare da kulawa ba, sannan su nisanci lodin wutar lantarki fiye da kima. Haka kuma, dole ne a rika amfani da janareto a waje mai isasshen iska, yayin da ake bukatar a adana abubuwa masu kamawa da wuta a wurare masu aminci, nesa da zafi.
A lokacin taruka, ana bukatar kulawa da yara, samar da isasshen iska, da kuma kiyaye doka da oda. Haka kuma, a guji yin ajiye motoci ba bisa ka’ida ba wanda zai iya hana motocin agaji wucewa.
Dangane da yanayin zafi da ake ciki a halin yanzu, ana kara jaddada wa jama’a da su rika shan ruwa sosai, su rage kasancewa cikin tsananin zafi, tare da lura da alamomin cututtukan da ke da nasaba da zafi.
Hukumar ta kuma ja hankalin jama’a kan hadarin da ke tattare da rashin kula wajen sarrafawa da adana man fetur. Don haka ana kira ga kowa da kowa da ya yi taka-tsantsan musamman a gidaje da kuma wuraren sayar da mai.
Idan wata gobara ko wani hatsari ya faru, yana da matukar muhimmanci a kai rahoto cikin gaggawa ta wadannan lambobi: Hukumar Kashe Gobara ta Tarayya, Reshen Jihar Gombe: 070-314-97455
Lambar Gaggawa ta Kasa: 112
Hukumar Kashe Gobara ta Tarayya reshen Jihar Gombe na nan a shirye domin daukar mataki a kowane lokaci, tare da jaddada cewa kare lafiyar jama’a alhaki ne na kowa da kowa.
