A wani yunƙuri na kafa tubali mai ƙarfi wajen sa-ido da tantance ayyukan shirin AGILE, Shirin AGILE na jihar Gombe tare da haɗin gwiwar kamfanin Taruscom International sun gudanar da horon kwana biyu kan ƙirƙirar tsarin Dashboard na sa-ido da tantance ayyuka, tare da horaswa a aikace kan amfani da manhajar Kobo Toolbox.
Da take buɗe taron horon a Otel ɗin Custodian da ke Gombe, Mai Kula da Shirin a matakin jihar, Dakta Amina Haruna Abdul, ta yaba wa masu ba da shawara kan shirya wannan shiri, tana mai cewa horon zai taimaka matuƙa wajen sabunta ilimin mahalarta.
Dakta Amina Abdul ta ƙara da cewa, horon kamar yadda ke ƙunshe a cikin sharuddan aikin kamfanin masu ba da shawara an tsara shi ne domin horas da ma’aikatan Sashen Aiwatar da Shirin a jiha (SPIU) da kuma jami’an Tsarin Bayanai na Ilimi (EMIS) daga Ma’aikatar Ilimi, Hukumar Ilimin Bai-ɗaya ta Jiha (SUBEB) da kuma ƙananan hukumomi a faɗin jihar.
Don haka ta buƙaci mahalarta da su yi amfani da wannan dama domin amfana da ƙwarewar masu horaswar.
Tun da fari a jawabin buɗe taron, Shugaban sashen sa-ido da tantance ayyuka na AGILE a jihar, Malam Abubakar Sadiq Mohammed, ya bayyana cewa horon zai taimaka wa mahalarta su ƙara samun ilimi kan hanyoyin tattara rahotanni da sauran manhajojin da ake amfani da su wajen sa-ido da ayyukan AGILE.
Daga Gombe Wakilin GTA Hausa Amurka Ke Magana Aliyu Bala Gerengi Yana dauke da cikekken rahoto
