Ahalinda ake ciki kuma farashin mai mai daraja da ake kira Brent yayi tashin gwaron zabbi ranar talata, bayan wani sabon hari da Iran ta kai kan jirgin ruwa mai dakon mai a gabas ta tsakiya, da kuma gargadin da sakataren tsaron Amurka Pete Hegseth ya bayar cewa Washington zata zafafa kai hare hare muddin Farisa bata cimma yarjejeniya ba, hakan yasa farashin mai ya culla sama.
Danyen mai na Brent ya karu da dala 6 da centi 23, zuwa dala 119 kan ko wace ganga da misalin karfe 12 saura minti 25 agogon Amurka misalin hudu saura minti 25 agogon GMT, biyar saura 25 agogon Najeriya da Nijar, wadda yake nuna farashin man ya tashi da kashi 64 cikin dari cikin watan Maris, kamar yadda alkaluma suka nuna, tun shekara ta 1988, yayinda mai da ake kira West Texas, ya karu da kashi 56 cikin dari, rabon farashin ya kai haka tun shekara ta 2020.
A wani bincike da kamfanin dillancin labarai na Reuters ya gudanar ya nuna mai da kasashe da suke cikin Kungiyar OPEC suke hakowa yayi kasa da kamar ganga milyan 7.3 a ko wace rana, daga wata zuwa wata, zuwa ganga milyan 21 kusan da rabi ako wace rana, wannan shine mai mafi karanci da kasashe da suke cikin Kungiyar suka samarwa tun lokacin da annobar Covid 19 ta tsaida harkoki a duniya.
A karon farko cikin shekaru hudu, Amurka zata saidawa Girka mai, yayinda matatun mai suke neman wata kafar samun mai sakamakon yakin da ake yi a gabas ta tsakiya.
