Rundunar ’Yan Sandan jihar Gombe ta ƙaddamar da sabon hedikwatar sashen ’yan sanda a Gwani, da ke Ƙaramar Hukumar Ci Gaban Yamaltu Deba ta Gabas, domin ƙara kusantar da ayyukan tsaro ga al’umma.
Kwamishinan ’Yan Sandan jihar Gombe, CP Umar Ahmed Chuso, MNIPS, fwc, psc(+), ne ya jagoranci ƙaddamar da hedikwatar a yau Talata, 6 ga Oktoban 2026.
CP Umar Ahmed Chuso ya bayyana amincewar da Babban Sufeto-Janar na ’Yan Sandan Najeriya, IGP Olatunji Rilwan Disu, ya bayar na kafa sashen Gwani a matsayin wani muhimmin mataki na ƙarfafa tsaro tare da kusantar da ayyukan ’yan sanda ga al’umma.
Kwamishinan ya yabawa IGP Disu bisa amincewar, yana mai cewa kafa sabon sashen zai taimaka wajen ƙara yawan jami’an tsaro da kuma inganta saurin kai ɗauki ga matsalolin tsaro da ke tasowa a yankin.
Ya kuma yaba wa gwamnatin jihar, sarakunan gargajiya, shugabannin al’umma, Ƙungiyar Ci Gaban Al’ummar Gwani da sauran masu ruwa da tsaki bisa gudunmawar da suka bayar wajen ganin an cimma nasarar aikin.
Kwamishinan ’Yan Sandan ya umarci jami’ai da ma’aikatan sabon sashen da su gudanar da ayyukansu cikin ƙwarewa, ladabi, da ɗa’a, tare da mutunta haƙƙin bil’adama.
Ya kuma buƙaci jami’an da su samar da kyakkyawar hanyar tattara bayanan sirri, kasancewa cikin shiri a yankunan da ke ƙarƙashin ikonsu, tare da gaggauta ɗaukar mataki kan duk wata barazanar tsaro.
CP Chuso ya yi kira ga al’ummar Gwani da mazauna ƙauyukan da ke kewaye da yankin da su ɗauki ’yan sanda a matsayin abokan hulɗa wajen yaƙi da aikata laifuka.
Ya bukaci jama’a da su riƙa kai wa jami’an tsaro bayanai masu amfani da wuri, musamman kan abubuwan da suke zargi ko kuma duk wata barazanar tsaro da ka iya tasowa.
Haka kuma, ya buƙaci shugabannin al’umma da na addini, ƙungiyoyin matasa, mambobin Kwamitin Hulɗa tsakanin ’Yan Sanda da Al’umma (PCRC), ’yan kasuwa da sauran masu ruwa da tsaki da su ci gaba da tallafa wa jami’an tsaro wajen tabbatar da zaman lafiya.
Kwamishinan ya kuma yi gargaɗi kan buƙatar kare matasa daga faɗawa cikin aikata laifuka ko shiga ƙungiyoyin tashin hankali.
CP Umar Ahmed Chuso ya tabbatar wa al’ummar Gwani da maƙwabtan yankin cewa Rundunar ’Yan Sandan Jihar Gombe za ta ci gaba da tabbatar da doka da oda tare da samar da ingantaccen tsaro mai sauraron buƙatun jama’a.
Ya ce rundunar za ta ci gaba da amfani da tsarin tsaron da ya dogara da haɗin gwiwar al’umma, bayanan sirri da kuma ɗaukar matakan kariya tun kafin matsalolin tsaro su ta’azzara.
A wajen bikin ƙaddamar da sabon sashen, akwai shugabannin ƙananan hukumomi da yankunan ci gaba na Yamaltu Deba, Kwamishinan Kasuwanci, Masana’antu da Yawon Buɗe Ido na jihar, Sarkin Yamaltu, shugabannin al’umma, shugabannin addini, ƙungiyoyin matasa, mambobin PCRC, ’yan jarida da sauran manyan baƙi.
Rundunar ’Yan Sandan jihar Gombe ta sake yin kira ga al’ummar Gwani da sauran mazauna jihar da su ci gaba da bai wa jami’an tsaro cikakken haɗin kai domin ƙarfafa zaman lafiya da tsaro a faɗin jihar.
