Manchester United: Zirkzee Ya Amince Da Komawa Juventus Ko Napoli
Dan wasan gaba na Manchester United, Joshua Zirkzee, ya bayar da amincewarsa ga yiwuwar komawa daya daga cikin kungiyoyin Serie A ta Italiya, Juventus ko Napoli, yayin da ake rade-radin cewa koci Michael Carrick ya amince da sayar da dan wasan.
A cewar rahoton Metro na ranar Alhamis, 20 ga Agusta 2026, Zirkzee na cikin ‘yan wasan da Manchester United za ta iya sayarwa idan ta samu tayin da ya dace.
Dan wasan mai shekaru 25 ya koma United daga Bologna a shekarar 2024 kan kudi kusan fam miliyan 36.5, bayan da ya burge a gasar Serie A. Sai dai zamansa a Old Trafford bai kasance kamar yadda ake tsammani ba, musamman wajen zura kwallaye.
Zirkzee ya ci kwallaye biyar kacal a gasar Premier League tun bayan komawarsa Manchester United, yayin da ya zura kwallaye tara a wasanni 75 da ya buga a dukkanin gasa. Duk da nuna kwarewa wajen rike kwallo da kirkirar damar zura kwallo, rashin samun kwallaye akai-akai ya zama babban abin damuwa.
Dan wasan ya samu damar buga wasanni da dama a lokacin wasannin sada zumunta na tunkarar kakar wasa, amma an cire shi daga tawagar Carrick da ta kara da AC Milan a wasan sada zumunta na karshe ranar Asabar.
Wannan mataki ya kara karfafa rade-radin cewa Zirkzee na gab da barin Old Trafford, yayin da rahotanni ke cewa United za ta saurari tayin da ya dace.
Juventus ta dade tana sha’awar daukar dan wasan a wannan bazarar, amma kungiyar na bukatar fara gyara wasu bangarorin tawagarta kafin ta kammala cinikin.
Rahotanni daga Italiya sun ce Zirkzee ya shirya komawa Juventus ko Napoli, wanda hakan ya ba shi zabin kungiyoyi biyu idan ya yanke shawarar komawa Serie A, inda ya kafa suna a matsayin daya daga cikin matasan ‘yan wasan gaba masu hazaka.
Napoli ma ta nuna sha’awarta, ko da yake zakarun Italiya na duba wasu zabuka a harin gabansu, ciki har da Gabriel Jesus na Arsenal da Nicolas Jackson na Chelsea.
Manchester United na neman kudi tsakanin Yuro miliyan 35 zuwa 40 domin sayar da Zirkzee. Sai dai yiwuwar fara da aron dan wasan na iya zama zabin da ya fi sauki, tare da sanya sharadin saye na dindindin a karshen kakar wasa.
Idan Zirkzee ya bar Manchester United, hakan zai samar wa Carrick damar kara yin sauye-sauye a bangaren kai hari.
United na kuma ci gaba da tattaunawa kan daukar dan wasan tsakiya na Brighton, Carlos Baleba, yayin da kungiyar ke neman kara karfafa bangaren hagu na tsarinta.
Idan Zirkzee ya tafi, United na iya neman wani dan wasan gaba kafin a rufe kasuwar saye da sayar da ‘yan wasa.
Lafiyar Benjamin Sesko na iya taka muhimmiyar rawa wajen yanke wannan hukunci, domin dan wasan ya shafe dukkanin wasannin share fage yana jinya sakamakon raunin kashi, abin da ya sanya shakku kan ko zai kasance cikin shirin buga wasan farko na Premier League da Hull City ranar Asabar.
Sai dai United na da wasu zabuka, yayin da Bryan Mbeumo ya taka rawar gani a matsayin dan wasan gaba a wasu wasannin share fage, sannan Matheus Cunha ma zai iya taka wannan matsayi.
