Masarautar Kaltungo a jihar Gombe dake arewa maso Gabashin Najeriya ta karɓi baƙuncin wani taron yini ɗaya na daidaita ayyukan kiwon lafiya, wanda Gidauniyar Sultan Foundation for Peace and Development ta shirya tare da haɗin gwiwar Hukumar Bunƙasa Kula da Lafiya Matakin Farko ta jihar Gombe.
Taron, wanda ya haɗa sabbin jami’an da aka ɗauka daga masarautu da ƙananan hukumomi tare da sauran masu ruwa da tsaki, ya mayar da hankali ne kan ƙarfafa haɗin gwiwa da ƙara shigar al’umma wajen aiwatar da shirye-shiryen kiwon lafiya, musamman na yara da mata.
Da yake buɗe taron, Mai Kaltungo, Injiniya Saleh Muhammad, ya buƙaci mahalarta su kasance masu kyautatawa, sauraro da kuma mai da hankali, tare da nuna jajircewa wajen ganin an cimma manufofin shirin.
Mai martaban ya kuma waiwayi tarihin yadda sarakunan gargajiya suka taka muhimmiyar rawa a harkokin kiwon lafiya a Najeriya, yana mai cewa masarautun gargajiya na da muhimmiyar gudunmawa wajen wayar da kan jama’a da tallafa wa shirye-shiryen gwamnati na inganta kiwon lafiya.
A nasa ɓangaren, Babban Jami’in Ayyuka na Sultan Foundation, Barrister Haruna Yusuf, ya jaddada muhimmancin kula da yara da samar musu da abinci mai gina jiki domin inganta lafiyarsu da bunƙasa rayuwarsu.
Barrister Yusuf ya kuma yaba da ƙoƙarin sarakunan gargajiya, ƙarƙashin jagorancin Mai Alfarma Sarkin Musulmi, bisa gudunmawar da suke bayarwa wajen inganta lafiyar yara, iyaye mata da sauran al’umma.
Shi ma Dr. Kassim Muhammad ya jaddada muhimmancin allurar rigakafi wajen kare al’umma daga cututtuka, tare da bayyana muhimmiyar rawar da sabbin jami’an da aka ɗauka za su taka wajen sa ido da tabbatar da dorewar ayyukan rigakafi a faɗin Jihar Gombe.
Ya yi kira da a ƙara wayar da kan jama’a domin su fahimci cewa allurar rigakafi ba ta da illa, yana mai cewa rashin yi wa yara rigakafi a lokacin ƙuruciya na iya haifar da matsaloli ga lafiyarsu a nan gaba.
Taron ya kuma samu halartar masu ruwa da tsaki, inda mahalarta suka gabatar da tambayoyi tare da samun amsoshi da ƙarin haske daga masu jawabi kan batutuwan da suka shafi rigakafi, abinci mai gina jiki da sauran muhimman harkokin kiwon lafiya.
