Jiya Litinin, Kawayen Amurka a Kungiyar tsaro ta NATO, sunce ba za su shiga cikin matakin Shugaba Trump na killace tashoshin ruwan Iran ba, suna masu shawarar cewa, za su shiga cikin lamarin ne da zarar an daina yaki, matakin da babu mamaki zai fusata shugaba Trump, kuma ya kara bata dangantaka tsakanin kasashe da suke cikin kungiyar.
Trump yace sojojin Amurka za su gama da duk wani jirgin ruwan Iran da ya je kusa da inda Amurka ta shata layi cikin ruwa wadda ya fara aiki daga jiya Litinin, bayanda zaman sulhu da suka gudanar a karshen mako a Pakistan ya kasa cimma matsaya domin kawo karshen yakin na mako shida da Iran.
Tunda farko Trump ya fada cewa Amurka zata yi aiki da wasu kasashe domin su hana zirga zirga a mashigin ruwa na Hormuz, amma daga bisani rundunar sojin Amurka ta kara bada bayanin cewa hana zirga zirga zata shafi jiragen ruwa da suka fito ko za su tashoshin ruwan Iran ne mataki zai shafa.
Amma kawayen Amurkan ciki harda Britaniya da Faransa sunce babu yadda za’ayi su shiga cikin rikicin, maimakon haka suka ce suna aiki kan wasu matakai domin ganin an bude mashigin ruwan, inda ta nan ne kashi 20 cikin dari na mai da iskar Gas da duniya ta dogara akai suke bi.
