Yanayin sanyi me tsanani ya lullube sassa da dama na Amurka cikin dusar kankara mai yawa, da ruwan sama me daskarewa zuwa kankara, abinda ya jawo tsaiko ga zirga-zirgar ababen hawa, har da na jiragen sama.
Bishiyoyi sun fadi tare da tsinkewar layukan wutar lantarki saboda nauyin kankara da ta sauka a kan su, abinda ya haddasa rashin wuta ga dubbannan gidaje da wuraren kasuwanci a kudu maso gabashin kasar.
An yi hasashen cewa kankara tare da dusar Kankara zata ci gaba da saukowa har zuwa ranar Litinin, tare da sanyi me tsanani. Za’a shafe kwanaki cikin yanayin da ka iya kawo hadari ga matafiya kan hanya da ginunnuka, a cewar hukumar kula da yanayi ta kasa.
Dusar kankara me yawa na fadowa daga kwarin Ohio zuwa arewa maso gabashin kasar, yayin da taruwar daskararriyar kankara mai hadari ke barazana ga yankin can kasan kwarin Mississippi, zuwa yankin tsakiyar tekun Atlantika, da kudu maso gabashin kasar.
Da ta ke amsa tambayoyin Manema labarai ta waya, mai hasashen yanayi Allison Santorelli, ta ce wannan yanayi na da ban ne, domin ya ratsa kusan ko ina a kasar, ya Shafi wurare tun daga jihohin New Mexico da Texas, har can zuwa yankin New England. Ta ce abin ya bazu kusan mil 2000 ke nan.
Tun ran Asabar ne, shugaba Donald Trump ya yarda da Sanya dokar ta baci a jihohi kusan 12. Hukumar gudanar da agajin gaggawa ta tarayya ta saka masu bada agaji da kayan aiki a jihohi da dama, a cewar sakatariyar tsaron cikin gida Kristi Noem.
