Kakakin majalisar wakilai na kasar Amurka Mike Johnson ya shiga tsaka mai wuya, wajen kokarin ganin kasafin kudin da aka tsara ya samu wucewa, saboda kaucewa durkusar da ayyukan gwamnati na wani bangare zuwa lokaci me tsawo, bayan da takkadama ta yi tsanani tsauraran dokokin da shugaba Donald Trump ya sa kan shige da fice.
Johnson ya ce ya dogara ga taimako daga Trump don ganin an zartar da kasafin. Trump a nasa bangaren ya cimma yarjejeniya da ‘yan majalisar dattawa don cire kasafin kudin da za’a yi amfani da shi a ma’aikatar tsaron cikin gida daga sauran gundarin kasafin, bayan da jama’a suka nuna fushin su kan kisan mutane biyu yayin gudanar da zanga-zangar adawa ga Jami’an shige da fice a jihar Minnesota.
A yarjejeniyar, za’a bawa ma’aikatar tsaron cikin gida kudi na kankanin lokaci zuwa 13 ga wannan watan, wannan ya bawa majalisar kasa wa’adi ta yi kokari ta samo matsaya daya kan sababbin iyakokin da za’a gindaya kan aikin jami’an shige da fice da aka fi sani da ICE.
