Farashin danyen mai ya tashi a kasuwannin duniya a ranar Alhamis, da kashi 3 cikin dari, inda aka yi cinikin gangar mai akan dala 84 da centi 32 na mai da ake kira Brent, yayinda wadda ake kira West Texas ya tashi kan dala 79 da centi 6 da tsakar ranar jiya agogon Amurka, yayinda yakin hadin guiwar Amurka da Isra’ila akan Iran ke kara tsanani, lamari da ya kassara jigilar mai daga gabas ta tsakiya.
An sami karin hare hare kan jiragen ruwa masu dakon mai a wuraren da suke yankin Gulf, rahotanni suka ce jiragen yaki da basu da matuka daga Iran sun kutsa Azerbaijan ranar Alhamis, mataki da yake barazana ga kara bazuwar yaki zuwa kasashe dake hakar mai a yankin.
Iran ta auna hari kan wani jirgin ruwa mai dakon mai dauke da tutar Bahamas, wadda yake tsaye a wata tasha a gabar Iraqi, haka nan wani jirgin ruwa ba nesa da gabar ruwan Kuwait ya fara kwasar ruwa, kuma har yana yoyon mai, bayan da ya fuskanci wani abun fashewa a tashar da yake.
An kaiwa jiragen ruwa 9 hari tun barkewar fada tsakin hadin guiwar Amurka da Isra’ila kan Iran a ranar Asabar data shige. Iran ta harba makamai masu linzami kan Isra’ila a ranar Alhamis, kuma jiragen yakin kasar maras matuka a wani kutse da suka yi a Azerbaijan ya jikkata mutum hudu, har aka ji Azerbaijan tana barazanar zata maida martani.
Kimanin jiragen ruwa dari biyu ne, dauke da mai da iskar gas, da masu dakon kaya ne suke tsaye a gabar ruwaye dake yankin Gulf ahalin yanzu, kamar yadda wani kiyasi da kamfanin dillancin labarai na Reuters yayi bisa la’akari da bayanai daga wata kunigya dake sa ido kan zirga zirga jiragen ruwa a duniya.
A cikin kalamansa na baya bayan nan shugaban Amurka Donald Trump, yace tilas ya tsoma baki wajen wadda zai gaji marigayi Shugaban addinin Iran, kuma yace ko kusa Amurka ba zata amince dan tsohon shugaban addinin Ayatollah Khameni ya gaji mahaifinsa ba.
