Kotun Tarayya da ke zamanta a Gombe ta umarci Jam’iyyar PDP da ta gudanar da sabon zaben fidda gwani domin fitar da ɗan takararta na kujerar gwamnan jihar Gombe a zaɓen 2027.
Mai shari’a Amina Aliyu Mohammed ce ta jagoranci shari’ar, bayan da Usman Aliyu Garry, Khamisu Ahmed Mailantarki da Abdulkadir Hamma Saleh suka shigar da ƙara suna ƙalubalantar fitowar Farfesa Isa Ali Pantami a matsayin ɗan takarar gwamnan jihar na PDP.
Garry, Mailantarki da Abdulkadir sun ƙalubalanci fitowar Pantami bayan da jam’iyyar ta sanar da shi a matsayin ɗan takararta tilo a ranar 26 ga Yuni, 2026, yana mai cewa ba a gudanar da zaɓen fidda gwani yadda doka ta tanada ba.
Pantami, wanda a baya ya kasance ɗan takarar neman kujerar gwamna a ƙarƙashin Jam’iyyar APC, ya koma PDP ne bayan da APC ta amince da Jamilu Gwamna a matsayin ɗan takarar da aka cimma matsaya a kansa.
Daga bisani, Pantami ya samu tikitin PDP ta hanyar amincewa da murya (voice affirmation) yayin zaɓen fidda gwamnan jam’iyyar da aka gudanar a watan Mayu.
Sai dai a hukuncin da ta yanke ranar Alhamis, kotun ta umarci PDP da ta gudanar da sabon zaɓen fidda gwani, bisa bin ƙa’idojin jam’iyyar da kuma tanade-tanaden dokokin zaɓe da suka dace.
