Rasha ta nemi ta matsa wa Amurka lamba ta hanyar yin tayin daina ba Iran bayanan sirrin soja, muddin kuwa Washington za ta dakatar da bai wa Ukraine nata bayanan sirri, in ji shugaban Ukraine, Volodymyr Zelenskiy, a ranar Laraba.
Zelenskiy, wanda a ranar Litinin ya ce, rundunar leƙen asirin sojan Ukraine na da “tabbatattun hujjoji marasa shakka” cewa Rasha na ci gaba da bai wa Iran bayanan sirri, ya shaida wa kamfanin dillancin labarai na Reuters cewa ya ga waɗannan bayanai, amma bai bayar da cikakken bayani ba.
Yayin da yake magana daga fadar gwamnatin ƙasa a birnin Kyiv, Zelenskiy ya ce wasu jiragen yaƙin marasa matuƙa (drones) na Iran, waɗanda ake amfani da su wajen kai hare-hare kan kadarorin sojan Amurka da ƙawayenta a yaƙin Gabas ta Tsakiya, na ɗauke da wasu sassa da aka ƙera a Rasha.
Ya ƙara da cewa: “Ina da rahotanni daga hukumomin leƙen asirinmu da ke nuna cewa Rasha na yin haka, tana cewa: ‘Ba zan ba Iran bayanan sirri ba idan Amurka ta daina bai wa ukraine nata bayanan sirri.’ Shin wannan ba matsin lamba ba ne? Lallai haka ne.”
