Amurka za ta “fice daga Iran cikin gaggawa” kuma za ta iya komawa domin kai “hare-hare lokaci zuwa lokaci” idan akwai bukata, a cewar shugaba Donald Trump, wanda ya shaidawa kamfanin dillancin labarai na Reuters a ranar Laraba, sa’o’i kaɗan kafin ya gabatar da jawabi ga al’ummar ƙasar a daren laraba game da yaƙin.
Yayin da rikicin ya shiga mako na biyar, kuma Trump ke fuskantar matsin lamba kan yadda zai kawo ƙarshen rikicin, sakamakon hauhawar farashin mai, shugaban ya tsara yin jawabi da ƙarfe 9 na dare domin bayyana matakin da za a ɗauka gaba. Jawabin nasa zai rufe wata rana da ta fara da ziyarar tarihi da Trump ya kai Kotun Koli.
Trump, a wata hira ta wayar tarho da Reuters, ya ce ɗaya daga cikin muhimman abubuwan jawabin nasa shi ne bayyana rashin jin daɗinsa da ƙungiyar NATO, saboda abin da yake ganin rashin goyon bayan da ƙungiyar ke bayarwa ga manufofin Amurka a Iran.
Rikicin siyasa tsakanin Amurka da ƙawayenta na Turai ya ƙara tsananta, a zangon mulkinsa na biyu bayan da ƙasashen Turai suka ƙi amincewa da bukatarsa na taimakawa wajen tabbatar da tsaron zirga-zirgar man fetur ta mashigar Hormuz.
Ya ce yana “la’akari ƙwarai” da yiwuwar fitar da Amurka daga NATO, wata ƙungiyar yarjejeniya da Majalisar Dattawan Amurka ta amince da ita tun a shekarar 1949. A baya ma Trump ya taɓa nuna sha’awar janyewa daga ƙungiyar, sannan kuma ya samu nasarar matsa wa mambobinta lamba su ƙara kashe kuɗi wajen harkokin tsaro.
